بكل مايحمله قلبي نحو عالم الشعر وأعذب الكلام

هذي مجموعه من اشعار الامير خالد الفيصل
الذي احمل له كل لاعجاب,,,,,


الله أكبر كيف يجرحن العيون
******كيف ما يبرى صويب العين أبد
أحسب إن الرمش لى سلهم حنون
******اثر رمش العين ما يأوي لاحد
يوم روّح لي نظر عينه بهون
******فزّ له قلبي وصفق وارتعد
لفّني مثل السحايب والمزون
******في عيوني برق وبقلبي رعد
نقّض جروحي وجدّد بي طعون
******قلت يكفي قالت عيونه بعد
وانعطف هاك الشعر فوق المتون
******وانثنى عوده وقفّى وابتعد
أشغلتني نظرة العين الفتون
******حيرتني بالتوعد والوعد
هي تمون العين وإلا ما تمون
******لى خذت قلبي وقفّت يا سعد

****************************

خذاك الزمن مني وترك لي أشواقي
ليته خذا ذكراك من كل أوراقي
الصهد ولّع حياتي ليتها لمعة قمر
تذكر أيام القمر؟كيف السمر أصبح سهر؟
كيف الأماني.. أصبحت شكوى عمر؟
ليه انطفى فيك الزمان؟
ليه اختفى فيك الأمان؟
خذاك الزمن مني
يا روعة أيامي ولوعة حاظري
يا بهجة الخافق ومتعة ناظري
تذكر الحب الأمل ؟
قبل يصبح ذكريات
تذكر الفرحة.. ولهفاتي عليك؟
أسبق الموعد إليك
ولحظة الشوق الكبير
والخفوق اللّي من الفرحة يطير
ورقصات الدقائق عند الوعد
وهمسات الحقائق قبل وبعد
ليه انطفى فيك الزمان؟
ليه اختفى فيك الأمان؟
خذاك الزمن منّي

***************************

أستطيع أمنع لساني لا يقول
******وأستطيع أمنع عيوني لاترى
وأستطيع أمنع يديني لا تنول
******وأمنع أذني عن سواليف الورى
لكن المشكل أنا وشلون احول
******دون فكري لو خيالي به سرى
شارد أفكاري على رغمي تجول
******كل ماعنّ الهوى وإلا طرى
كل نجمٍ للخيال أصبح ذلول
******بالفلك طوّاف لى ضاق الثرى
شاغلي يا راعي الطرف الخجول
******باع حبك في خفوقي واشترى
يا ربيع القلب في كل الفصول
******ورد حبك فاح عطره وأزهرا
مرّني طيفك على العادة عجول
******عز طيفك مثلما عز الكرى
ما نفع تحذيري القلب الجفول
******يرقد الخالي وعيني تسهرا
بسألك قلّي- ولو فيها فضول-
******كيف تذبح من يشوفك ما درى؟

******************************

تعال أسهر معك يا اسمر عشيّه
*****تعال أسلّي خاطرك يا عيوني
تهنّ وخلّ عيني بك هنيّه
*****أنا وإياك والدنيا تهونِ
ترى الدنيا لياليها شقيّه
*****حذاريِ تستبد بك الظنونِ
نويت وكل قلبٍ فيه نية
*****على إني لك وفي روحي تمونِ
هواك بخاطري سوى سوية
*****تركني بين أياديك معنون

********************************

يا وش بقى بأعطيك منّي ولا جاك
*****ما باقي إلا روحي أحيا بها لك
أوصف جمالك كل ما أنشدت وأهواك
*****وازيّن أيامي بجلسة خيالك
يا الغايب الحاضر بقلبي ولا ألقاك
*****أقرب من عروقي وصعبٍ منالك
شالك زماني عن عيوني ووداك
*****لا شك وثّق في ضلوعي حبالك
يا حاجبٍ شمسي ورى ليل جفواك
*****ما بالعهد بك قاسيٍ في دلالك
وش غيّرك يا منوة القلب و أطغاك
*****على حبيبٍ ما تخيّر بدالك
دنياي ما تصلح بلا شمس دنياك
*****والليل يوحش لو تغيّب هلالك
ما ينقطع ظما الهوى إلا على ماك
*****ولا يهوّن حره إلا ظلالك
ولا تشوف العين زينٍ بليّاك
*****ولا يطرّب سمعي إلا مجالك
ولا انتفض قلبي من الحب لولاك
*****ولولاك ما يبدي علي مابدالك

****************************

ما هو صحيح القلب للقلب شاهد
****لو هو صحيح أصبحت مفتون فيني
بيني وبينك حب من قلب واحد
****ليته يجيك من الهوى ما يجيني
وليتك تعرف الشوق لى صار واجد
****وليتك تعرف أوجاع كثر الحنينِ
ما قد شكيت الحر والجو بارد
****ولا سهرت بليل طول السنينِ
ولا مشيت العمر والحظ قاعد
****ولا تحديت الألم والونينِ
أضحك وأنا لجروح الأحباب جاحد
****أداري المكنون عن كل عينِ
ما ودي أفرّح على القلب حاسد
****وإلا عذابي في عيوني يبينِ
شيٍ يهون وشي بالحيل كايد
****يا كود تجريح الخفوق الحزينِ
من عانده وقته وقلبه يعاند
****مالت به الدنيا يسار ويمينِ
غرّتني أمثال العرب بالشواهد
****يبيك قلبي وأحسب إنك تبيني



تحياااااااااااااااتي

مساء الود والحب والمعاني
مساء التبريكات والتهاني


اشكرك اختي شوق على طرح نبض من نبضات معاني الامير الشاعر الفيصل..




متميز والاميز انتقاءك


اخوك
شقاوي الفيصل