طبعا كثير ما نشوف مواضيع حركات رومنسية من الزوجه لزوجها ..

بس هالمرة من الزوج لزوجته ..

الفكرة الاولى :

لما ايكون عندكم مناسبة عيد زواجكم ولا عيد ميلادها .. طبعا هي بتموت عشان تعرف انت ويش بجيب لها هدية .. وكل ساعة تبغي تضرب لك خشات ونغزات عشان تذكرك بالمناسبة بس انت يا ابو الشباب سوا روحك ولا تدري بالسالفة ومطنش حدك وقول لها بوديش اليوم بيت اختي او بيت امي يبغون ايشوفونك .. وانت روح بيتكم وزينه بالبالونات والشموع والزين .........الخ .. ومحضر اليها الهدية اللي خاطرها ونفسها فيها .. مثل عطر نظارة ساعة شئ ذهب خاتم اسواراة ... وطبعا لا تنسى تشتري العشاء الجاهز وانت بعد اتجهز روحك من لبسك وكشختك .. تمر عليها وتوديها البيت وتفاجأها بالحفلة الصغننونة اللي مسونها ..


الفكرة الثانية :

تقول لها يا ام فلان روحي جيبي الغرض الفلاني من السيارة بسرعة ضروري .. واتسوي روحك مشغول بشئ وما تقدر تروح تجيبه .. طبعا هي بتروح طوالي على السيارة بس انت بتكون محضر لها مفاجأة وردة حمراء ندية مع رسالة حب او شعر جميل .. تحطه لها فوق الغرض اللي طلبت منها اتجيبه ..

الفكرة الثالثة :

لما تعزم اصحابك مثلا للبيت واتكون زوجتك تاعبه نفسها بالطباخ والنفاخ وما خلت طبخة الا وسوتها ... وحتى لو كان قدوع بسيط ..
بعد ما تودي الاكل للمجلس والجماعة يخلصون الاكل كله ويحشونه حش ... تروح لها تجيب الشاي وبعدين اتسوي لها بأصبع الابهام انتي جذي .. عرفتون الحركة .. عشان اتبين لها ان الاكل كان تمام وكل شئ كان مميز ولذيذ ولا تنسى طبعا كلامك ومدحك للأكل حتى لو كان مغبر ومالح وماله طعم .. تعرف ان التعب اللي تحس فيه كله بيروح من كلماتك اللي صارت مثل البلسم على قلبها ..




الفكرة الرابعة :

لما انت تجي من الشغل واهي تكون مشغولة بالطباخ وما تدري .. مو تقعد تصارخ يا فلانة ويش صار بالغداء استوى لو بعده .. وكأنك ملهوف .. ادخل بالعدال وبدون ما تحس فيك وروح لها المطبخ وفاجأها وضمها اليك .. وقول لها طبعا من بعض الكلام الحلو وانك مشتاق لها وطوال عملك كنت تفكر فيها.. وحتى لو كانت ريحتها ثوم وبصل لما اتشوف منك هالحركة بسرعة بتخلص الطباخ وبتعدل روحها وتسنع حالها ..

الفكرة الخامسة :

طبعا يوم الاجازة الزوجة محتاجة للتغيير والطلعات والروحات بس في رجال ما يودون زوجاتهم الا بالحنة والزن على دماغهم يالله يرضون..بس انت عاد لازم اتصير هالمرة غير اتقولها جهزي نفسك بنروح بيت واحد صديقي .. طبعا هي بتصدق .. وحاول في السيارة تكون الاجواء مختلفة تحط موسيقى وتقول لها كلام حلو عشان تحلو الطلعة .. بس المفاجأة انك ما بتوديها بيت صديقك لا بتوديها المكان اللي هي اتحب اتروحه او مكان حلو ما راحته مثلا مطعم البحر الملاهي السينما تطالعون فيلم مجمع او أي مكان خاطرها اتروحه ... والله انها بتسانس وما بتصدق.

وتذكروا يا اخواني ان زوجاتكم قلوبهم طيبة ويحبونكم بس محتاجين منكم اتحسسونهم بالحنان والحب وادلعونهم اشويه ..

والله يهنيكم مع بعض ويجعل المودة والرحمة تعشش بقلوبكم ..