السلام عليكم ورحمة الله
حصاوي يعشق النميمة
(حصاوي في محل يلتقي فيه مع بعض الأصحاب والمعارف)
عاصم: شفت حلاوتهم حنينه ازاي معايا؟ كانت واحشاني قوي.
حصاوي: ايوه كنت دايما تكلمني عليها وهي مسافرة.
عاصم: بس من ساعة مارجعت, بتستلف مني وما بتردش.
حصاوي: طب ما تطالبها بالفلوس.
عاصم: مش عايز احرجها.. وخصوصا عندها حالة نفسية بتفشر وبتقول إنها مناضلة والأمن قبض عليها.
(ينهض عاصم ويذهب لدورة المياه وتعود حلاوتهم)
حلاوتهم: صاحبك كان بيقول لك إيه عليا؟
حصاوي: الراجل كان بيقول عليكي كل خير. دا بيحبك جدا.
حلاوتهم: أنا ست متجوزة. هو اللي بيفهم الناس أني حبيبته ومش عارفه أعمل إيه.
حصاوي: طيب ماتقولي له.
حلاوتهم: مابيفهمش.. والمصيبة كل واحدة تتكلم معاه يقول للناس أنها بتموت فيه.
عاصم:( وقد عاد) كنتوا بتتكلموا عن إيه؟
حلاوتهم: عن سي مجدي اللي سهرت معاه مرة مد أيده عليا. بس أنا بعترت كرامته.
عاصم: طب وطي صوتك لحسن قاعد في الطرابيزة اللي هناك.
حلاوتهم: هو هنا؟ طب لما أقوم أسلم عليه.
(تنهض حلاوتهم فتدخل فلحوسه)
عاصم: أهلا فلحوسه حبيبتي.. اتفضلي. تاخدي كاس؟
فلحوسه: ح أقعد شويه مع تهته وأجي لكم.
عاصم: فلحوسه دي كل ما تلاقي ترابيزة عليها ويسكي ومزة تقعد عليها. أنا بطلت افتح ويسكي قدامها. بتخلص لي القزازة علي بق. وتهته بيه دا اللي عامل تقدمي لما بيسكر يقعد يعاكس أي ست.
حصاوي: طب بتقولي أنا ليه؟ ما تروح تقوله هو.
عاصم: مش عايز أكسفه دا صاحبنا, وأحسن من أبوشبت, اللي بيقبض من جريدة عربية بتهاجم مصر, وبرضه مش بكسفه لأنه رمز من رموز الناصرية.
فلحوسه: سمعت يا تهته عن لطفي اللي مراته هربت مع ضابط؟
تهته: عشان كده المسكين أعصابه تعبانة وبيتعصب علينا.
حصاوي:( لعاصم) مش عيب الناس تنقل الكلام في ضهر بعض وتقعد مع بعض؟
عاصم: عيب جدا طبعا.
حصاوي: بس أنت نفسك بتنقل لي الكلام حتي علي حبيبتك.
عاصم: لا أنت صاحبي وحلاوتهم حبيبتي ومش ح تقولوا لحد ولا حتي لبعض.
حصاوي:( حصاوي ينهض ويجلس إلي مائدة بعيدة)
الجرسون: قاعد لوحدك ليه ياأستاذ حصاوي؟
حصاوي: كل واحد بيتكلم في ضهر التاني. وأنا مش عايز اسمع نميمة.
(الكل يجتمعون في مائدة وتتقارب رؤوسهم ويتهامسون)
حصاوي: الجماعة اتلموا في ترابيزة واحدة. أكيد بيتكلموا في السياسة.
الجرسون: لا دول بيتكلموا عليك أنت يا أستاذ حصاوي.
(حصاوي يضحك حتي يستلقي علي قفاه)
الجرسون:( بدهشة) حضرتك بتضحك علي إيه؟
حصاوي: أصل كل العمر ده وما اكتشفتش أني حصاوي إلا النهارده..
الجرسون: اشمعني؟
حصاوي: عشان بقعد مع حمير
كتب : لينين الرملى
العرض العادي
