الصديق: أصل الموضوع له أصل. احكي لي يا تامر المدرس طلب منك إيه.
تامر: طلب مني أفتن ع التلاميذ زمايلي اللي يتشاقوا ويعملوا زيطه وهو مش موجود في الحصة.
حصاوي: ليه بيبقي موجود فين؟
تامر: بيروح يدي دروس خصوصية في البيوت. كتبت له أسامي اللي بيتشاقوا. والمدرس عاقبهم كلهم. وبالذات الواد صفوت أدي له حته علقة بالمسطرة.
حصاوي: دا أكتر واحد بيشاقي؟
تامر: لأهو بيقعد ساكت. بس بصراحة دمه تقيل علي قلبي يا أونكل.
الصديق: وليه لأ؟ ما دام العيال بيشتاقوا ما يفتنش عليهم ليه ؟ هو فيه تعليم ينفع في زيطه ودوشه؟ والأهم أن إبني طلع الأول.
حصاوي: قولي يا تامر. المدرس ما طلبش منك تكتب أسامي العيال اللي أولياء أمورهم ضد مجانية التعليم؟
تامر: لا. مش فاهم. يعني إيه؟
حصاوي: بكرة لما تكبر هتفهم وتكتب أسامي كل الكبار اللي بيتشاقوا ويعملوا دوشه.
(بعد فترة يزور حصاوي صديقه فيشكو له بحزن)
الصديق: العيال اللي كانوا بيتشاقوا أتعلموا الأدب. قام المدرس أداهم إجابة الامتحان وخدوا كلهم الدرجة النهائية والمفتش كتب تقرير كويس في المدرس قام عمل حفله للولاد ووزع عليهم شيكولاتة وكرامله
حصاوي: طب وأنت إيه اللي مزعلك؟
صديق: أبني مابقاش الأول عليهم
العرض العادي
